Претседателот на СДСМ, Венко Филипче, во изјава за јавноста се осврна на актуелните случувања во партијата и на иницијативата на дел од членовите, оценивајќи ја како обид за создавање нова фракција по моделот на „ЗНАМ“.
„Јас сум се видел со тие луѓе во изминатиот период, поединечно. Сметам дека тоа е платформа којашто е нов ЗНАМ. Тоа се луѓе коишто беа на многу високи партиски функции, коишто молчеа кога се формираше првиот ЗНАМ. Па сега сакаат со пуч да ја преземат партијата,“ истакна Филипче.
Тој посочи дека ваквите чекори се случуваат токму во деновите кога опозицијата објавува значајни владини скандали поврзани со лобирање и отворање нови рудници. Според него, позади дел од овие лица стојат лични интереси и добиени државни тендери, додавајќи дека пратеничката Славјанка Петровска наместо во Собранието, учествувала на овие состаноци.
„Како тоа, на денот кога ние објавуваме еден од најголемите скандали за власта, а тоа е дека има компанија којашто финансира лобирање за премиерот, и кога објавуваме еден од најголемите скандали – дека ќе се отворат пет нови рудници, нешто за што огромно мнозинство од граѓаните се против – тие излегуваат и го прават тоа?“ рече тој.
Филипче нагласи дека има легитимен четиригодишен мандат добиен од над 10.000 членови и порача дека вратите на партијата се отворени за дебата, но нема да дозволи внатрешна фрагментација во момент кога рејтингот на партијата бележи раст.