-Во мое време немаше труење со вода, ниту епидемија во Гостивар – му одговори претседателот на СДСМ, Венко Филипче, на Мицкоски по обвинувањата дека додека тој бил министер за здравство, јавноста не била информирана за случаи со неисправна вода за пиење.
-Во мое време немаше труење, а немаше ни епидемија во болницата. Имаше ли епидемија во Гостивар? Немаше. Имаше ли труење? Немаше. Мицкоски вчера мавташе со нешто, со некој документ, ама освен што мавта со обвинителство, тој и ништо друго не прави – рече претседателот на СДСМ, Венко Филипче, на денешниот брифинг со новинарите.
Филипче потсети на состојбата со водата во Гостивар, потенцирајќи ги задоцнетите реакции на институциите и мерките кои доаѓаат откако проблемот веќе добил сериозни размери.
-Водата во Гостивар е показател дека сите реакции задоцнуваат. Дури денеска Министерството за здравство носи некакви препораки за рано детектирање и откривање симптоми, детекција на пациенти, кога веќе епидемијата има многу силен замав. Сега стигнуваат препораки од Комисијата за заразни болести. Пред две недели предупредив дека следно што може да се јави е хепатит. Максимално несериозна импровизација и задоцнета реакција. Нема ниту одговор какви превентивни мерки се преземаат за тоа што евентуално може да се јави како резултат, како компликација на сегашната состојба. Ако има таква вода, следно се нечисти раце, нечиста вода, следно е хепатит. Тоа се знае. Тоа се учи во средно медицинско училиште, не се учи на факултет, порача Филипче.
Тој реагираше и на препораките граѓаните да користат техничка вода, посочувајќи дека институциите мора да дадат јасни одговори за нејзината безбедност и потекло.
-Има вода која е загадена со колиформни бактерии, која не само што не е за пиење, туку не е ни за туширање, а се дава препорака да се користи, замислете, техничка вода. Како ќе ја користат? Од каде е таа техничка вода? Кој ја контролира техничката вода? Од каде рестораните имаат техничка вода? Храната се мие со таа вода. Како стигнува водата до луѓето? Кој е овој степен на импровизација?, рече Филипче.