Претседателот на СДСМ, д-р Венко Филипче, во интрвјуто во емисијата „Вин-Вин“, на телевизија Телма, нагласи дека тој го направи првиот чекор за ставање на државниот интерес пред партиските разлики. Филипче потсети на периодот кога тој побара состанок со Мицкоски за реформите и доброто на државата, но Мицкоски не покажа интерес и подготвеност, и го злоупотреби обидот.
„Јас се обидов многу брутално и драматично да направам дисконтинуитет во таа култура на политичка демонизација која што овде трае, не е тоа од сега, туку со години. Јас отидов на состанок кај премиерот после пожарот во Кочани. Тогаш кога никако не му бев потребен, затоа што оваа власт сега има двотретинско мнозинство. Затоа што ние не можеме никако да ја блокираме работата во Собранието, со филибастеринг, така како што ВМРО го правеше тоа кога ние имавме многу тенко мнозинство, плус еден или двајца пратеници“, рече Филипче.
Филипче посочи дека неговата цел за тој состанок беше да се забрзаат рефромските процеси а со тоа и напредокот на државата кон европскиот пат.
„Зошто? За да ја надминам, да го прекинам тој дотогашен начин на непријателство и на такво функционирање. Зашто ако нешто кажеме дека треба да се направи, јас решив тоа да го направам почнувајќи од себе си. И што направи Мицкоски? Ништо. Ме излизга. Предложив дебатата да биде во Собранието. Предложив дебатата и соработката за доброто на државата да биде преку остварувањето на реформската агенда“, рече Филипче.
Тој додаде дека и покрај понудената рака од опозицијата, власта не одговори ниту на законските предлози, ниту на сугестиите поврзани со реформските процеси и евроинтеграциите.
„Што се случи? Ништо не направија. Не ни одговараат на нашите сугестии на законите кои што беа во Собранието. Сега сè уште се брка да се фати грејс периодот за продолжувањето од Европската Унија, да се стигне и до буџетите и да се оствари. Зошто Мицкоски не го препозна тоа? Така што, од таму потекнува тој континуитет, кој што немаат волја да го прекинат, на политичка демонизација, заради тоа што немаат одговор на ниту едно прашање. Ниту пак имаат желба и волја да ја водат државата како што треба. Што, впрочем, не се познава само по тоа, тоа е само еден сегмент“, порача Филипче.