Претседателот на СДСМ, д-р Венко Филипче, денеска присуствуваше на одбележувањето на 83-годишнината од масакрот на младинците во Ваташа. Од настанот, тој упати порака за важноста на историските лекции во контекст на денешните општествени и политички процеси.
Во своето обраќање пред присутните, Филипче потенцираше дека ваквите историски настани треба да служат како опомена за последиците од деструктивните политики.
„Денеска присуствуваме на одбележувањето на 83-годишнината од масакрот, убиството на младинците тука во Ваташа од страна на бугарскиот окупатор. Ова нѐ учи дека политиките на омраза и на поделба единствено до што водат се трагедии“, истакна Филипче.
Лидерот на социјалдемократите порача дека современото општество има одговорност да ги негува и унапредува основните демократски столбови кои беа изградени по завршувањето на глобалниот конфликт.
„Затоа имаме обврска денес, во денешно време, да ги зајакнуваме демократијата, владеењето на правото и сите вредности и политики коишто произлегуваат од ужасите на Втората светска војна“, додаде Филипче.