Претседателот на опозициската СДСМ, Венко Филипче, упати остри критики кон Владата предводена од Христијан Мицкоски, оценувајќи ги последните владини мерки како ненавремени и неефикасни. Според него, одлуките доаѓаат премногу доцна за да можат реално да го заштитат стандардот на граѓаните.
Во одговор на новинарско прашање, Филипче истакна дека спиралата на покачување на цените веќе е започната и дека граѓаните секојдневно се соочуваат со сè поскапи производи и услуги.
„Мерките се задоцнети, недоволни и нема да имаат апсолутно никаков ефект, поради тоа што спиралата на покачување на цените веќе започна. Кога ние предупредувавме дека треба да се воведат навремено, како што тоа го направија многу земји во регионот, власта беше без слух, едноставно не нѐ послуша и затоа е оваа ситуација“, изјави лидерот на СДСМ.
Филипче предупреди дека кризата дополнително ќе се продлабочува и дека финансискиот товар најмногу ќе се одрази врз семејните буџети. Тој ја обвини Владата за целосна негрижа кон народот.
„Кризата ќе станува сè потешка, граѓаните сè повеќе ќе ја чувствуваат на својот грб. За жал, власта е тотално неодговорна и заинтересирана само за себе и своите бизниси“, заклучи Филипче.