Претседателот на СДСМ, д-р Венко Филипче, изјави дека најавата на власта за нова „кошничка“ е уште еден ПР-трик на Мицкоски, зад кој нема реална мерка за помош на граѓаните. Филипче порача дека по досегашното искуство не очекува ништо од најавената „кошничка“, додека граѓаните се соочуваат со сè повисоки трошоци за живот.
„Од ова што го спомнува некаква кошничка, јас не очекувам ништо, заради тоа што сметам дека е повторно само некој ПР трик, нешто ќе најават и на крај нема да биде ништо“, рече Филипче.
Филипче посочи дека луѓето едвај преживуваат со минимална плата од 26.000 денари и минимална кошничка која достигна скоро 70.000 денари само за основни трошоци за живот.
„Поскапува струјата, поскапува парното. Што може да очекуваат луѓето? 26.000 денари е минималната плата. Неколку пати го одбиваат нашиот предлог да се зголеми минималната плата на 600 евра. Кошничката достигна 70.000 денари. Ако се додадат другите трошоци, реални, кирија за стан или кредит за стан, трошоците надминуваат 90 илјади денари. Луѓето не можат да преживеат“, рече Филипче.
Претседателот на СДСМ нагласи дека наместо конкретна економска помош, граѓаните добиваат најави и ПР-мерки, додека Мицкоски и неговата Влада.
„Што е вистината и суштината? Христијан Мицкоски ниту има знаење, ниту капацитет, ниту желба да ја води државата како што треба. Човекот е заинтересиран само за себе и својата мала група на луѓе околу него. Ништо друго“ рече Филипче.