Управата за финансиска полиција поднесе кривична пријава до Основното јавно обвинителство Скопје против едно физичко и едно правно лице поради сомнение за сторени кривични дела „Даночно затајување“ и „Фалсификување или уништување на деловни книги“.
Според Финансиската полиција, со пријавените дејствија Буџетот на Република Северна Македонија бил оштетен за вкупно 7.211.359 денари.
Како што информираат од Управата, првопријавениот М.Д., во својство на сопственик и управител на правното лице, во текот на 2021 година со намера да се стекне со противправна имотна корист, преку фиктивно книжење присвоил наплатени средства од продажба на нафта и нафтени деривати во износ од 7.040.484 денари.
При тоа, според наводите, не биле пресметани и уплатени данок на личен доход, данок на додадена вредност и данок на добивка во вкупен износ од над 3 милиони денари.
Од Финансиската полиција наведуваат дека во 2024 година, осомничениот повторно преку несоодветно евидентирање на залихи во вредност од 12.630.670 денари, не прикажал обврски за данок на додадена вредност и данок на личен доход во вкупен износ од над 3,3 милиони денари.
Според пријавата, со вкупните дејствија на физичкото и правното лице е предизвикана штета на државниот буџет во износ од 7.211.359 денари.