Вицепремиерот задолжен за политики за добро владеење, Арбен Фетаи, на денешната конститутивна седница на Националниот совет за финансиски истраги и конфискација на имот, порача дека ова тело претставува пресвртница во борбата против организираниот криминал. Според него, главната цел на Советот е да воспостави јасен политички правец и да ја елиминира досегашната фрагментираност во институциите.
„Овој Совет не е само уште една структура, туку директен одговор на потребата за силна координација и постојан политички надзор. Нашата улога не е оперативна, туку политичка – да дефинираме приоритети, да ги отстраниме системските пречки и да обезбедиме ресурси,“ истакна Фетаи.
Тој додаде дека Националната стратегија за периодот 2025-2028 година е целосно усогласена со европските стандарди, но нагласи дека сега се потребни конкретни и мерливи резултати. Како претседавач со Советот, Фетаи смета дека ова е клучниот форум кој ќе ја замени „институционалната какофонија“ со задолжително и заедничко дејствување на сите органи.