Федералниот судија му нареди на Трамп да врати на работа илјадници отпуштени работници

Федерален судија во Калифорнија им нареди на шест американски агенции да ги вратат на работа илјадниците неодамна ангажирани работници кои беа отпуштени како дел од кампањата на претседателот Доналд Трамп за масовно намалување на федералната бирократија.

Одлуката на судијата Вилијам Алсуп, донесена за време на рочиштата во Сан Франциско, се однесува на Министерството за одбрана, Министерството за ветерани, Министерството за земјоделство, Министерството за енергетика, Министерството за внатрешни работи и Министерството за финансии.

Минатиот месец Алсуп привремено ја блокираше Канцеларијата за управување со човечки ресурси (ОПМ), која ги надгледува федералните агенции, да не нареди отпуштања на вработените кој биле на пробна работа. Но, тој тогаш не донесе одлука за нивно враќање на функцијата.

Пробните работници обично имаат помалку од една година стаж во нивната сегашна улога, иако некои се државни службеници со долг стаж. Тие имаат помала заштита на работните места од другите владини службеници, но по правило можат да бидат отпуштени само поради слаби резултати.

Судијата Алсуп сега одлучи дека ОПМ нема овластување да наредува отпуштања и дека има докази дека незаконски наредила отпуштања во шест одделенија. Но, тој не им нареди на преостанатите 16 министерства наведени во тужбата од страна на синдикатите и непрофитните организации да ги вратат отпуштените работници.

„Тажен ден е кога нашата влада отпушта добар работник и тврди дека тоа е поради работните резултати, но тие многу добро знаат дека тоа е лага“, рече Алсуп.

Размерите на кампањата на Трамп за намалување на федералната бирократија би можеле да станат појасни уште денес, кога истекува рокот за државните агенции да поднесат планови за втор бран масовни отпуштања и буџетски кратења.