Поранешната германска канцеларка Ангела Меркел денеска во Стразбур го прими Европскиот орден за заслуги, со кој Европскиот парламент ѝ оддаде признание за нејзиниот децениски ангажман и посветеност на Европската Унија. Таа е вклучена меѓу првите 20 добитници на ова одликување како „истакнат член“, што претставува највисокото ниво на ова признание, заедно со Володимир Зеленски и Лех Валенса.
Во својот говор пред европратениците, Меркел упати сериозно предупредување дека современата демократија се наоѓа под голем притисок, нотирајќи ја и улогата на дигиталниот простор.
Поранешната канцеларка повика на безусловно зачувување на демократијата, мирот и просперитетот како клучни ветувања кон граѓаните на ЕУ, нагласувајќи дека преку дезинформациите на социјалните мрежи директно се загрозуваат темелите на просветителството. На свечената церемонија со свој говор се обрати и првиот човек на Европскиот парламент, ставајќи акцент на процесот низ кој поминал континентот.
„Европа не ни е дадена на подарок – истакна претседателката на Парламентот, Роберта Мецола, за време на церемонијата. – Таа се градеше договор по договор, криза по криза, и тоа од луѓе кои избраа солидарност наместо поделби и соработка наместо личен интерес“
За време на нејзиното раководење со Германија од 2005 до 2021 година, Меркел се стекна со епитетот „кризен менаџер на Европа“, водејќи го континентот низ еврокризата, бегалската криза, Брегзит и пандемијата. Покрај неа, со орденот беа одликувани главно поранешни лидери на земји-членки, поранешни челници на ЕЦБ и на НАТО, но и личности од уметноста, како ирската рок-група „У2“ (U2).