Словенечката европратеничка со македонско потекло, Ирена Јовева, во изјава за МИА оцени дека не е фер Северна Македонија да се става во ист контекст со Србија и Босна и Херцеговина кога се зборува за напредокот на земјите од регионот на европскиот пат.
– Морам да кажам дека Црна Гора и Албанија, а особено Црна Гора, се најнапредни во однос на реформите и напредокот. Но, не би сакала да испадне дека ја критикувам еврокомесарката Марта Кос или Европската комисија, само мислам дека не е фер Северна Македонија да биде ставена во истиот кош со Србија, па дури и со Босна и Херцеговина, изјави Јовева, која е дел од либералната група „Да ја обновиме Европа“.
Таа нагласи дека таквата оценка е премногу општа и не ја одразува реалната состојба во земјата.
– Не може да се каже дека Северна Македонија не напредувала. Напротив, има напредок, иако не во иста мера како Црна Гора, но сепак заслужува да се признае дека се движи напред, рече Јовева.
Според неа, ако Извештајот на Европската комисија за 2025 година се чита внимателно, се гледа дека земјата бележи реални резултати и дека тоа треба јасно да се потенцира.
– Мислам дека таквиот наратив не е ниту правилен ниту фер, особено од страна на Европската комисија. Северна Македонија напредува и е на добар пат кон Европската Унија, истакна словенечката европратеничка.
Јовева одби да се согласи со тврдењата дека Унијата нема волја да ја прими Северна Македонија и дека само го користи спорот со Бугарија како изговор.
– Како некој што има добар увид во процесите, можам да кажам дека таквите проценки не се точни. Моментумот постои, а реалноста е дека Северна Македонија има направено напредок. Прашањето не е дали ЕУ сака или не сака, туку кога ќе се финализира процесот, нагласи таа.
Јовева потсети дека спорот со Бугарија е билатерален и тоа јасно е нагласено и од Европскиот парламент и од Европската комисија.
– Како што не е фер Северна Македонија да се споредува со Србија во контекст на европскиот напредок, така не е фер ни да се користи регионалната ситуација за собирање евтини политички поени. Северна Македонија е држава што заслужува членство во Европската Унија и верувам дека ќе стигне до таму – само треба да продолжи со реформите, порача Јовева.