Бројни јавни личности од политичкиот, општествениот и естрадниот живот преку социјалните мрежи продолжуваат да изразуваат сочувство и со голема тага се збогуваат со кантавторот Владо Јаневски.
Меѓу нив се огласи вицепремиерот и министер Александар Николоски, кој истакна дека со неговите песни пораснале цели генерации.
„Замина Владо Јаневски… Пораснавме со неговите песни, незаборавни моменти од една убава младост… Имав чест да го познавам и навистина беше уметник од светска класа, господин каков ретко се гледа. Почивај во мир Владо“, напиша Николоски.
Со куса порака се јави и неговата долгогодишна колешка, поп-ѕвездата Каролина Гочева, споделувајќи ја својата омилена композиција од него.
„Владе мој, Збогум со мојата најомилена песна од тебе… и никогаш нема да заборавам“, порача Гочева.
Поетот и писател Дарко Лешоски се присети на урбаните легенди поврзани со пејачот од деведесеттите години, нагласувајќи го неговото големо музичко наследство.
„Би сакал да верувам дека е пак “рекла казала” од ʼ90 -ти, кога имаше сида во Русија, па само да се појавиш од нигде никаде на МТВ како промовираш нов албум… Твоите липи ко плин и твојот Џубокс се дел и од мојот живот. Како и на илјадници. А од такво наследство – нема ништо поскапо… Ништо! Почивај во мир!“, истакна Лешоски.
Во јавните простувања се приклучи и Богдан Илиевски, кој потенцираше дека значењето на Јаневски за сцената е општо познато.
„Збогум Владо. Беше значаен дел /и/ од… мојот живот. Што да пишувам „од македонската музичка сцена“, кога тоа сите го знаат. Има нешто посилно од се. Почивај во мир“, напиша Илиевски.