Безбедноста на Ормутскиот теснец, кој е од клучно значење за глобалната трговија со нафта, директно зависи од присуството на американските сили во тој регион.
Ова го изјави претседателот на иранскиот парламент и главен преговарач, Мохамад Багер Галибаф, упатувајќи директни закани додека траат тензиите со Вашингтон.
Иран порача дека доколку не му биде овозможено да ја извезува сопствената нафта поради конфликтот со САД, ќе го спречи извозот и за сите останати земји од регионот.
Заземајќи цврст став околу кризата во Ормутскиот теснец, Галибаф се огласи на социјалната мрежа „Х“:
„Оваа војна не остава средина, сè е или ништо. Во овој регион, ако не можеме ние да ја продадеме нашата нафта, тогаш никој друг нема да може. Нашата безбедност е предуслов за целата регионална инфраструктура; без неа, ништо не останува безбедно.“
Реакцијата на Техеран следи откако американскиот претседател Доналд Трамп претходно објави дека САД ќе уништат мост или електрана во Иран за секој напад врз брод во теснецот.
Конфликтот меѓу САД и Иран повторно ескалираше на почетокот на јули околу контролата врз Ормутскиот теснец, откако Иран нападна неколку објекти и бродови во теснецот.
Како одговор на тоа, американските воени сили извршуваа напади врз цели во Иран 11 ноќи по ред.