Полицијата денеска употреби солзавец за да ги растера демонстрантите кои ги блокираат француските средни училишта, во знак на протест поради недоволниот број просветни работници и лошите услови во училиштата.
Во Марсеј и во Нант, на претежно мирни собири, демонстрантите носеа транспаренти на кои пишуваше „Државата го уби националното образование“. Во Тулуз, родителите маршираа низ градот во колона држејќи се за раце. Но, во Стразбур, Лион и Рен, протестите станаа насилни, при што полицијата употреби солзавец, а демонстрантите подметнуваа пожари и фрлаа предмети на улиците.
Синдикатот на средните училишта соопшти дека повеќе од половината француски средни училишта се блокирани, додека некои локални власти се обидоа да организираат настава преку интернет. Групите за човекови права, учениците и родителите ги обвинија властите за употреба на непропорционална сила. Од друга страна, владата тврди дека движењето е преземено од „надворешни лица“ и се претворило во урбано насилство.
Според податоците од Министерството за внатрешни работи, од почетокот на протестите приведени се 6.100 лица, претежно малолетници.
„Повеќе од 1.800 лица се процесуирани, од кои 1.483 малолетници“, соопшти Министерството за правда, без да ги прецизира прекршоците.
Канцеларијата на премиерот Себастијан Лекорну објави дека во протестите се повредени најмалку 715 полицајци и 215 тинејџери. Премиерот Лекорну им нареди на министрите да се справат со главните барања на учениците, кои вклучуваат замена за отсутните наставници, преиспитување на должината на училишниот ден од осум до 18 часот и подолги паузи за ручек.
„Владата, исто така, ќе ги разгледа потребните поправки за постарите училишни згради“, посочи Лекорну.