Авиокомпании ширум светот предупредуваат на можни доцнења и откажувања на летови откако „Ербас“ побара итни модификации на околу 6.000 авиони од семејството A320, поради откриена софтверска ранливост предизвикана од силна соларна радијација, објави 4NEWS.mk
Проблемот бил откриен по инцидент на лет меѓу Канкун и Њу Џерси, кога авион бил погоден од нагла и интензивна соларна бура. Радиацијата предизвикала оштетување на податоци во компјутерот ELAC – систем кој управува со крилата и хоризонталниот стабилизатор. Оштетените податоци довеле до ненадејно спуштање на авионот.
„Ербас“ соопшти дека авионот неодамна добил нова верзија на софтвер, а ваков проблем никогаш не се појавил со претходната верзија. Производителот нагласува дека реагира „од претпазливост“, сам ја известил регулативата и побарал од авиокомпаниите да ги применат неопходните измени.
„Виз Ер ерлајнс“ денес потврди дека некои од нејзините авиони се меѓу повеќе од 6.500 авиони „Ербас А320“ на кои им е потребно ажурирање на софтверот, како што утврдил нивниот производител.
Унгарската нискобуџетна компанија веќе итно закажа „неопходни работи за одржување со цел целосно да одговори на новата ситуација“.
Виз Ер истакнува дека оваа ситуација може да влијае на некои летови за време на викендот.
EasyJet потврди дека е запознаен со инструкциите од „Ербас“ и дека соработува со производителот и безбедносните власти. Компанијата предупреди на можни доцнења и откажувања и најави дека патниците директно ќе бидат известени за сите промени.
„Безбедноста е наш највисок приоритет“, наведуваат од компанијата.
Air New Zealand: Откажувања на повеќе летови денес
Air New Zealand соопшти дека е погодена од „глобален софтверски проблем“ кај авионите A320neo. Компанијата ќе спроведе ажурирање на софтверот пред секој следен лет, но предупреди дека тоа ќе предизвика доцнења и откажувања на голем број летови во текот на денот.
Патниците ќе бидат индивидуално контактирани доколку нивниот лет е засегнат.
Од британската CAA велат дека нарушувања може да има „во одредени околности“, бидејќи не сите авиокомпании користат авиони A320 или засегнатите модели. Регулаторот е во контакт со сите оператори и очекува ажурирањата да се спроведуваат во наредните денови.
Советот до патниците е да ги проверуваат страниците и апликациите на авиокомпаниите.
Како е откриен проблемот?
Според „Ербас“, проблемот бил откриен по инцидент на лет на JetBlue во октомври, кога авионот претрпел нагло губење висина и бил принуден на итно слетување. Тогаш 15–20 патници биле полесно повредени.
Причината најверојатно била силна соларна радијација која ги оштетила податоците во еден од компјутерите за контрола на летот.
Околу 6.000 авиони низ светот се засегнати, а повеќето ќе можат да се поправат со брзо софтверско ажурирање. Сепак, приближно 900 постари авиони ќе треба да добијат целосна замена на компјутерите, поради што привремено ќе бидат приземјени.
Што следува?
„Ербас“ предупредува дека може да има нарушувања на летовите додека авиокомпаниите ги спроведуваат модификациите. Повеќето ажурирања се едноставни, но операторите најавуваат дека патниците треба да очекуваат можни доцнења во следните денови