Претседателката на Европскиот парламент, Роберта Мецола, упати силен апел до граѓаните на Иран да истраат во своите протести, и покрај суровата репресија од страна на режимот во Техеран. Повикот доаѓа во време кога демонстрантите низ Иран се соочуваат со ограничувања на комуникациите и блокада на интернет, додека безбедносните сили применуваат сила против учесниците во протестите.
Мецола преку социјалната мрежа „Икс“ им се обрати на демонстрантите:
– „До тие храбри девојки, студенти, мажи и жени на улиците: Ова е ваш момент“, напиша таа, нагласувајќи дека режимот кој ги блокира комуникациите всушност покажува дека се плаши од сопствениот народ.
Таа ги повика лидерите во Техеран итно да го променат курсот, истакнувајќи дека барањата за слобода и достоинство се легитимни и дека „убиствата мора да престанат, невините мора да бидат ослободени, а репресијата мора да заврши“.
Мецола исто така повика земјите-членки на Европската Унија да го засилат притисокот врз Техеран и порача дека Европа има должност да дејствува во заштита на основните човекови права.
Според регионалните медиуми, некои европски политичари исто така изразиле поддршка за протестите и ги повикале иранските власти да ги почитуваат граѓанските слободи, што предизвикало реакции од иранската мисија при ЕУ која ова го оцени како мешање во внатрешните работи на Иран.