Во просториите на Универзитетот на Југоисточна Европа во Скопје денес ќе се одржи панел-дискусија на тема „Од диплома до вработување – како високото образование да одговори на барањата на економијата“.
Настанот го организира Балканскиот институт за регионална соработка во партнерство со Форумот за разумни политики и Институтот за општествени и хуманистички науки – Скопје. Панелот се реализира во рамките на проектот „Застапување за инклузивен развој“, кој е поддржан од Владата на Швајцарија преку програмата Цивика мобилитас.
Свои обраќања ќе имаат заменик-министерот за образование и наука Дритон Сулејмани, Марјан Бојаџиев од Институтот за општествени и хуманистички науки – Скопје и потпретседател на Стопанската комора на Македонија, проф. д-р Блерта Абази Чауши, декан на Факултетот за бизнис и економија при УЈИЕ, како и Марија Башеска од „Finance Think“. Воведните излагања ќе ги одржат Гордан Георгиев од Форумот за разумни политики и Џелал Незири од Балканскиот институт за регионална соработка.
Според организаторите, настанот ќе собере претставници од академската заедница, бизнис-секторот, институциите и граѓанските организации со цел да се отвори дискусија за подобро усогласување на високото образование со потребите на пазарот на трудот и економскиот развој.
Тие посочуваат дека темата е особено значајна во услови кога се наметнува потребата образовните политики поефикасно да одговорат на барањата на стопанството и работниот пазар во земјава. По воведните презентации ќе следуваат панел-дискусија и дебата со учесниците и присутната публика.