Основното јавно обвинителство Велес покрена истражна постапка против две лица кои се осомничени за кривично дело „Неовластено производство и пуштање во промет наркотични дроги“, откако биле фатени при транспорт на голема количина марихуана.
Според информациите од Обвинителството, осомничените заеднички транспортирале околу 65 килограми марихуана. Нивната рута била пресретната на наплатната рампа „Стоби“, во близина на Градско.
Првиот осомничен, 38-годишен скопјанец, управувал автомобил со скопски регистарски ознаки во кој ја пренесувал дрогата, спакувана во четири големи црни патни торби. За транспортот да помине непречено, бил ангажиран и втор осомничен – 55-годишен жител на Кавадарци. Тој имал улога на „чистач“, односно со друго возило се движел како претходница со задача да го предупреди скопјанецот за евентуални полициски контроли на патот.
Сепак, планот им пропаднал на наплатната рампа „Стоби“. Полициските службеници забележале сомнително движење на автомобилот во кој била дрогата. Кога му дале знак на возачот да застане за легитимирање, 38-годишникот со голема брзина го пробил пунктот и се дал во бегство кон Градско. Полицијата веднаш тргнала во потера по него, по што успеале да го стигнат. При прегледот на возилото, биле пронајдени четирите торби полни со марихуана.
Јавниот обвинител веќе доставил предлог до судијата на претходна постапка од Основниот суд во Велес за определување мерка притвор за првиот осомничен.