Министерот за економија и труд, Бесар Дурмиши, на денешната прес-конференција по повод две години од работата на ресорот ги презентираше клучните економски резултати, реализираните реформи и мерките за заштита на животниот стандард. Тој потенцираше дека во фокусот на министерството во изминатиот период биле вработувањето, поддршката на бизнисот и новите инвестиции.
Дурмиши посочи дека наместо политички оценки, приоритет на прес-конференцијата се конкретните бројки.
„Денес не сум тука да зборувам за политички оценки. Тука сум да зборувам за резултатите. Во изминатите две години реализиравме политики кои имаат директно влијание врз граѓаните, компаниите и економскиот развој на државата“, истакна министерот Дурмиши.
Како одговор на глобалните кризи, пазарот беше стабилизиран преку кошнички и ограничување на маржите. На полето на пазарот на труд, успешно се спроведени оперативните планови за вработување за 2024, 2025 и 2026 година. За тековната 2026 година, преку буџетот се обезбедени 2,41 милијарди денари за поддршка и обуки на 10.352 граѓани.
Направени се измени во повеќе од 20 закони во областа на трудот, рестартиран е Економско-социјалниот совет, а прагот за репрезентативност на синдикатите е скратен од 10 на 5 отсто. Во рамки на Реформската агенда оптимизирани се 28 парафискални давачки, а мапирани се и 100 административни постапки за дигитализација.
Дополнително, за финансиска поддршка на инвестициите годинава се издвоени 1 милијарда и 230 милиони денари. Како успешен пример беше наведена ТИРЗ Тетово, каде е најавена и нова инвестиција на компанијата „CAVO Otomotiv“ вредна 21 милиони евра, која ќе донесе 550 нови работни места.
На крајот, министерот порача дека реформите продолжуваат со цел градење поотпорно стопанство.
„Свесни сме дека остануваат бројни предизвици, но уверен сум дека реформите што ги започнавме се цврста основа за поконкурентна, поиновативна и поотпорна економија. Продолжуваме со истата цел – повеќе инвестиции, повеќе работни места, посилни компании и подобар животен стандард за секој граѓанин“, порача министерот за економија и труд, Бесар Дурмиши.