Министерот за економија и труд, Бесар Дурмиши, од собраниската говорница денеска порача дека дебатата за минималната плата е политички инструирана и не ја отсликува реалната слика на пазарот на труд. Одговарајќи на пратеничко прашање од Левица, тој изнесе податоци според кои бројот на луѓе кои живеат само од минимална плата е занемарлив.
„Во земјата има вкупно 700.000 вработени. Оние 30.000 кои добиваат минимална плата, всушност се регистрирани како индивидуални трговци (трговци поединци). Тие не зависат само од платата, туку и од приходите на нивните фирми. Реално, само околу 3 до 4 отсто од вработените земаат минимална плата“, истакна Дурмиши.
Тој нагласи дека Владата не е против раст на платите, посочувајќи ги зголемувањата во јавниот сектор (здравство, образование, одбрана), но предупреди дека секое „ад хок“ решение кое не се базира на продуктивност, ќе предизвика инфлација и затворање на компании. „Во јануари имаме 0,7 отсто намалување на инфлацијата. Ако донесеме политичка одлука за платите, ќе се намали куповната моќ“, додаде министерот, повикувајќи на договор меѓу синдикатите и работодавачите.