Поради долготрајните топлотни бранови и сушата, нивото на реката Дунав се доближи до историски најниските вредности, предизвикувајќи сериозни проблеми во речниот сообраќај, туризмот и производството на електрична енергија во повеќе европски земји.
Според податоците од Унгарската управа за води, нивото на Дунав во Будимпешта се спушти на само осум сантиметри над рекордно најниското ниво забележано пред осум години. Оваа ситуација остави заглавени голем број речни крузери северно од унгарската престолнина, нанесувајќи му големи штети на туристичкиот сектор.
Од унгарската компанија за речен транспорт MAHART-PassNave соопштија дека нивото на реката сè почесто паѓа под минимумот потребен за нормална пловидба.
- Речните крстарења сè уште можат да влезат во Унгарија, но неколку бродови се заглавени или чекаат во пристаништата поради ниските нивоа на водата, изјави извршниот директор на MAHART-PassNave, Ласло Сомоѓи.
Тој додаде дека речните патувања се најважен сегмент од бродската индустрија во земјата, со околу 600.000 патници годишно. Компанијата забележа пад од 18 проценти во резервациите во јули поради откажувања. Во меѓувреме, и компанијата „Avalon Waterways“ соопшти дека морала да откаже дел од поаѓањата на Дунав и Рајна.
Екстремно нискиот водостој предизвика проблеми и во енергетскиот сектор. Романија соопшти дека го исклучува и вториот реактор во нуклеарната централа „Чернавода“, откако претходно беше затворен првиот. Ова е првпат двата реактори да бидат исклучени истовремено поради низок водостој, што ќе го зголеми увозот на струја во земјата. Поради истите причини, унгарската нуклеарна централа „Пакс“ привремено затвори еден од своите четири реактори.
Државната агенција за управување со водите во Романија информираше дека протокот на устието на Дунав падна на 1.650 кубни метри во секунда, што е драстичен пад во однос на јулискиот просек од 4.750 кубни метри, со можност да се доближи до историскиот минимум од 1985 година.
Повлекувањето на водата откри и археолошки остатоци. Во северна Бугарија, во близина на селото Рјахово, мештаните забележаа коски за кои експертите од Регионалниот историски музеј во Русе веруваат дека му припаѓаат на древен мамут.
„Не би го нарекол ова сензација, но секое откривање на толку антички остатоци е многу важно за науката“, рече директорот на музејот Николај Ненов.