Во сабота започнува граѓанска иницијатива за заштита на Охридскиот мировен договор, соопштија денеска од Демократската унија за интеграција (ДУИ). Поводот за собирот е последната одлука на Уставниот суд за укинување на имињата на улиците во Тетово, кои важеа цели две децении.
Од партијата посочуваат дека незадоволството на граѓаните е многу пошироко бидејќи постепено се намалуваат правата што произлегуваат од Охридскиот договор.
„Тетово ќе биде местото каде што илјадници граѓани ќе се соберат на мирен и достоинствен протест за да го одбранат уставниот поредок, правната сигурност и вредностите што веќе 25 години обезбедуваат мир, стабилност и добри меѓуетнички односи во Република Северна Македонија“, се вели во соопштението од ДУИ.
Од ДУИ потенцираат дека Советот на Општина Тетово своевремено ја донел одлуката со законско двојно мнозинство, но дека актуелната локална власт воопшто не ја бранела пред Судот.
„Во текот на постапката, Судот побара дополнителни информации и документи од Општина Тетово. Општината не одговори и не ја бранеше својата одлука. Таквиот однос има сериозни последици и некој треба да понесе одговорност.“
Според партијата, овој чекор на Уставниот суд создава опасен преседан за правната сигурност на државата, особено пред претстојното одлучување за Законот за употреба на јазиците.
„Саботниот протест е повик до институциите да постапуваат одговорно, да го почитуваат Уставот и да го зачуваат Охридскиот рамковен договор како основа за соживот и за европската иднина на државата. Ги повикуваме сите граѓани кои ги поддржуваат овие вредности да ни се придружат мирно, достоинствено и одговорно“, се додава во соопштението.