Демократската унија за интеграција остро ги осудува скандалозните постапки на министерот Иван Стоилковиќ, кој наредил отстранување на натписите и идентификациските ознаки на албански јазик на Агенцијата за примена на јазиците, продолжувајќи го на тој начин отворениот институционален напад врз албанскиот јазик, обвинуваат од ДУИ.
Додека Стоилковиќ секојдневно дејствува против присуството на албанскиот јазик во институциите, ВЛЕН продолжува да молчи. Овој молк повеќе не е политичка неспособност, туку соодговорност и целосно потчинување пред антиалбанските политики што се спроведуваат во рамките на Владата.
По притисоците врз албанската администрација и континуираните обиди за иселување на Агенцијата за примена на јазиците од постојните простории, сега започнаа и конкретни акти на бришење на албанскиот институционален идентитет, преку отстранување на таблите и натписите на албански јазик под смешното образложение за „реновирање“.
Уште од првите денови на формирањето на оваа Влада постоеше одлука и јасен план за протерување на Агенцијата од објектот каде што функционира. Денес јасно се гледа дека ова билo координиран политички проект за слабеење и маргинализирање на примената на албанскиот јазик.
Најскандалозно е тоа што институциите кои треба да го бранат албанскиот јазик се раководени од кадри на ВЛЕН, а тие не се осмелуваат да кажат ниту еден збор пред Стоилковиќ. Никаква реакција. Никакво спротивставување. Никакво институционално достоинство.
Јавно ги прашуваме раководителите на ВЛЕН:
До кога ќе молчите додека се отстрануваат албанските натписи од државните институции?
Дали сте во Влада за да ги заштитите Албанците или само за да ги зачувате вашите фотелји?
ДУИ потсетува дека за време на владеењето на ДУИ, албанскиот јазик напредуваше со конкретни одлуки, функционални институции и загарантирано институционално достоинство. Денес, Албанците гледаат враќање назад, понижување и отворени обиди за отстранување на албанскиот јазик од државните институции.
Албанскиот јазик не е декор што се отстранува по наредба на Стоилковиќ и со молкот на ВЛЕН. Тој е уставна категорија, стекнато право и црвена линија што Албанците нема да дозволат да биде допрена, стои во реакцијата на ДУИ испратена до медиумите.