ДУИ ја обвини коалицијата ВЛЕН дека како дел од Владата носи политичка одговорност за постапките и ставовите на своите коалициски партнери, откако во јавноста се појавија реакции за величење на Ратко Младиќ, правосилно осуден за геноцид, злосторства против човештвото и воени злосторства.
Од партијата велат дека Младиќ не може да биде предмет на релативизирање или различни историски толкувања, посочувајќи дека е осуден и за геноцидот во Сребреница.
„Ратко Младиќ не е фигура за дебата или историска интерпретација. Тој е осуден воен злосторник со доживотен затвор за геноцид, злосторства против човештвото и воени злосторства“, наведуваат од ДУИ.
Во реакцијата посебно го споменуваат вицепремиерот и министер за односи меѓу заедниците Иван Стоилковиќ и неговите ставови поврзани со Сребреница, оценувајќи дека станува збор за поширок политички однос, а не за изолиран случај.
Од ДУИ го критикуваат ВЛЕН дека реагира само откако во јавноста ќе се отвори одредено прашање, наместо, како дел од владејачката коалиција, да преземе политичка одговорност.
„И што прави ВЛЕН? Се однесува како да е невладина организација или опозициска партија“, велат од ДУИ.
Партијата случајот го поврзува и со односите на актуелната власт со политички структури од Србија и Република Српска. Го споменуваат и Милорад Додик, како и економските и енергетските партнерства со Србија, меѓу кои Алта банка, договорите во енергетиката и проектите за гасификација.
Според ДУИ, реакциите на ВЛЕН не се доволни сè додека коалицијата останува дел од истата Влада.
„ВЛЕН повеќе не може да се крие зад реакција на Фејсбук. Молкот пред величењето на геноцидот е толеранција, а толеранцијата во власта е соодговорност“, се наведува во соопштението.