Цигарите во Германија би можеле драстично да поскапат во следните неколку години. Германското Министерство за финансии планира постепено зголемување на даноците на тутунот, пренесува германската новинска агенција ДПА.
Според нацрт-законот во кој увид имала агенцијата, просечната цена на пакување од 20 цигари би можела да се зголеми од околу 8,80 евра во 2027 година на околу 11,40 евра до 2030 година.
Како дел од овие измени, даночната компонента во малопродажната цена би се зголемила од околу 4,40 евра на 5,75 евра по пакување. Планираните зголемувања ќе ги опфатат и сите останати тутунски производи на пазарот.
Од германското Министерство за финансии посочуваат дека примарната цел на оваа мерка е здравствената заштита на населението.
„Предлогот ќе послужи за заштита на јавното здравје, што е во согласност со целта за намалување на стапките на пушење кај младите и возрасните“, изјави портпаролот на Министерството, додавајќи дека зајакнувањето на државните приходи е клучен дел од напорите за консолидирање на јавните финансии, пренесува Феникс.
Со овој чекор, Берлин очекува сериозен прилив во државната каса. Дополнителните даночни приходи по години би изнесувале:
- 2027 година: околу 756 милиони евра
- 2028 година: околу 1,6 милијарди евра
- 2029 година: околу 2,5 милијарди евра
- 2030 година: околу 3,6 милијарди евра
Инаку, тутунските производи во Германија сè уште се сметаат за релативно евтини во споредба со дел од западноевропските соседи. Податоците од Германското здружение на цигари покажуваат дека кутија од 20 цигари во Германија чинела во просек 7,33 евра во 2024 година, додека во соседна Франција нејзината цена изнесувала дури 12,07 евра.