Еден од најпознатите хотели во Хрватска, „Мулино“, се запали утрово. Пожарникарите успеаја да го стават пожарот под контрола, но огнот сè уште не е целосно локализиран, пренесува „Индекс“.
Според началникот на противпожарната служба, Дино Козлевац, пожарот избувнал околу девет часот и го зафатил покривот на хотелот. Во гасењето беа вклучени 45 пожарникари и 20 возила.
На местото на настанот се наоѓаат членови на јавните противпожарни единици од Умаг, Бузет, Пореч и Пула, како и членови на доброволните противпожарни единици од областа Бује. „Заедно со нашите сили, пристигнаа и екипи на ДВД од Сечовље и членови на противпожарната бригада од Копер“, рече Козлевац, додавајќи дека станува збор за тешка интервенција.
Гостите на хотелот беа евакуирани веднаш по избувнувањето на пожарот.