Состојбата со пожарот на Халкидики синоќа беше делумно подобрена, а 481 лице беа евакуирани по морски пат, информираше директорот за стратешко планирање и комуникации во Противпожарната служба на Грција, Василис Ватракојанис.
Огнената стихија зад себе остави изгорена шумска површина, а зафати домови и возила, при што полесно беа повредени двајца пожарникари.
На терен интервенираа 227 пожарникари со 13 пешадиски тима и 57 возила, вклучувајќи и екипи од Молдавија преку Европскиот механизам за цивилна заштита, додека до заоѓањето на сонцето од воздух дејствуваа девет авиони и седум хеликоптери.
Преку организирана акција со патролни бродови, рибарски чамци и траект, од плажата во Сивири 285 лица беа пренесени во марината во Сани, додека 196 лица со траектот „Спидранер“ беа префрлени во Солун.
Сивири е целосно евакуирано, сообраќајот во регионот е во прекин, а враќањето на жителите и туристите сè уште не е дозволено.
Преку бројот 112 беа испратени четири пораки за предупредување, од кои три за итна евакуација на Сивири и Фурка.
За погодените лица е активирана специјална платформа од Министерството за туризам за привремено сместување: https://emergencyhotels.civilprotection.gr/Application/NewAppl?evId=e23298e4-7178-4666-891b-20066ab5416a
Во регионот се распоредени шест амбулантни возила и медицински тимови, додека македонското Министерство за надворешни работи соопшти дека ја следи состојбата преку Конзулатот во Солун.
„За дополнителни информации и итна помош, на располагање се дежурниот телефонски број на Министерството +389 75 268 736, електронската адреса globalsos@mfa.gov.mk, како и дежурните телефонски броеви на Конзулатот на Република Северна Македонија во Солун: +30 694 526 8068 и +389 71 323 001“ – наведоа од МНРиНТ.
Од Министерството апелираат до македонските државјани во засегнатите подрачја да ги почитуваат насоките на локалните власти.