Голем пожар избувна денеска попладне во близина на познатото туристичко место Сивири, сместено на првиот крак Касандра на полустровот Халкидики.
Поради брзото ширење на огнот, грчките власти веднаш реагираа и издадоа итно предупредување преку националниот систем за итни случаи 112.
Преку пораката, на сите жители и туристи кои моментално се наоѓаат во Сивири им е наредено веднаш да го напуштат подрачјето.
Според насоките од надлежните служби, сите лица треба да се упатат кон местото Мола Калива.
Наредбата за евакуација е донесена поради високиот ризик и опасноста огнот дополнително да се прошири.
Борбата со огнената стихија е сериозно отежната поради силниот ветер кој дува во овој дел од полуостровот.
Противпожарните екипи се веќе на терен и се обидуваат да го стават пожарот под контрола.