Силното невреме што вчера го зафати Куманово зад себе остави поплавени домови, деловни објекти и улици, а екипите на надлежните служби со часови работеа на отстранување на последиците. Денеска состојбата е ставена под контрола и повеќе нема активни интервенции.
Според Регионалниот центар за управување со кризи, најголем дел од пријавите се однесувале на поплавени подруми и навлегување вода во станбени и деловни објекти, при што е причинета материјална штета. Вода навлегла во објекти на повеќе локации низ градот, меѓу кои улиците „Моша Пијаде“, „Бајрам Шабани“, „Веселин Маслеша“, „Гоце Делчев“, „11 Октомври“, како и на булеварите „Октомвриска револуција“ и „Трета МУБ“. На дел од овие места нивото на водата во подрумските простории достигнало и до еден метар.
Поплавување било пријавено и на улицата „ЈНА“, во близина на трговски центар, каде исто така интервенирале спасувачките служби.
Во расчистувањето на последиците беа ангажирани екипи на Територијалната противпожарна единица, јавните претпријатија „Чистота и зеленило“ и „Водовод“, како и екипи на ЕВН. Тие извршија испумпување на водата, расчистување на погодените подрачја и презедоа активности за нормализирање на состојбата.
Паралелно со тоа, по престанокот на врнежите започна и чистење на улиците од насобраниот песок и чакал, како и прочистување на шахтите и одводните канали. На местата каде што дошло до излевање на фекалната канализација беше извршено миење и дезинфекција на коловозите.
Градоначалникот Максим Димитриевски најави дека по завршувањето на итните интервенции ќе следуваат дополнителни активности за целосно расчистување на сообраќајниците и санација на оштетените градилишта.
И покрај брзата реакција на службите, жителите повторно предупредуваат дека при секој пообилен дожд се повторуваат истите проблеми на повеќе критични локации во градот. Според нив, недоволната атмосферска канализација и ограничениот капацитет на постојната инфраструктура не можат да ја примат големата количина дождовница, поради што овие делови од Куманово редовно се соочуваат со поплави.