Поранешниот претседател на Република Српска, Милорад Додик, се огласи по одлуката на Соединетите Американски Држави да ги укинат санкциите против него, истакнувајќи благодарност до американскиот претседател Доналд Трамп за, како што вели, „исправката на големата неправда“.
Додик ја оцени одлуката како „морална рехабилитација на вистината за Република Српска“, нагласувајќи дека со тоа се поништуваат последиците од политиките на поранешните американски администрации.
Во објава на социјалните мрежи, тој напиша дека ѝ е благодарен на администрацијата на Трамп и неговите соработници за „исправката на големата неправда нанесена врз Република Српска, нејзините претставници и нивните семејства“, додавајќи дека таа неправда ја создале „администрациите на Обама и Бајден“.
„Одлуката за укинување на санкциите не е само правна, туку и морална рехабилитација на вистината за Република Српска и сите оние кои чесно ѝ служат. Уште еднаш се покажа дека сè што беше кажано против нас беше лага и пропаганда, врз која беше изграден големиот хаос што го создаде Кристијан Шмит – хаос што сега мора да се исчисти“, изјави Додик.
Тој додаде дека може да им прости сè на оние што, како што рече, „се фалеле и верувале во туѓите лаги во изминатите години, освен годините што ги изгубиле затоа што верувале дека Република Српска ќе падне“.
„Денес е јасно – таа никогаш нема да падне“, порача Додик.