Од 23 септември Хрватска воведува посебен вид визи за транспортерите од Македонија и земјите од Западен Балкан со цел олеснување на транспортот и престојот, изјави Биљана Муратовска од здружението „Макам-транс“ во емисијата „Аргумент плус“ на ТВ 24.
И покрај ова олеснување, проблемот со правилото 90/180 останува отворен и ќе се решава билатерално со секоја земја од шенген-зоната поединечно. Во врска со ова прашање, министерот за транспорт и врски, Александар Николоски, неодамна најави дека се преговара и со други европски земји, а досега се веќе склучени три вакви договори – со Хрватска, Романија и Швајцарија.
„Имајќи предвид дека беа препознаени како професионалци, сега може да добиваат долгорочни визи и затоа ние мора да работиме со што повеќе држави да постигнеме ваков договор. Тоа е единственото решение. Има неколку земји членки на шенген-зоната коишто не сакаат да има заедничко решение на сите земји членки. За жал, и визните правила се правила коишто се носат со консензус на ниво на Европска Унија, односно во случајов на шенген-зоната, и затоа решението е билатерално и ние билатерално работиме“, изјави Николоски.