Европските берзански индекси бележат пораст од над еден процент, додека цените на нафтата продолжуваат со падот. Овој тренд на пазарот доаѓа како резултат на зголемениот оптимизам за потенцијален крај на конфликтот меѓу САД и Иран.
Според берзанските податоци од 10:00 часот, цената на суровата нафта забележа пад од 3,06 проценти и се тргува за 99,126 долари, додека нафтата од типот „Брент“ падна за 2,61 процент на 106,955 долари.
Главна причина за ваквите движења е последната објава од Вашингтон.
„Претседателот на САД, Доналд Трамп, објави пауза во операцијата ‘Проект слобода’ околу Ормутскиот теснец, наведувајќи ‘значаен напредок’ кон сеопфатен мировен договор меѓу Вашингтон и Техеран“, објавува CNBC.
Позитивни резултати доаѓаат и од европските гиганти. „Ново Нордиск“ ја зголеми прогнозата за профит поради продажбата на лекови за слабеење, додека БМВ и „Пандора“ објавија резултати подобри од очекуваните.
На берзата TTF во Амстердам, европските фјучерси за гас за јуни се тргуваа по цена од 46,865 евра за мегават-час.
Што се однесува до индексите, франкфуртскиот DAX порасна за 1,55 проценти на 24.775,23 поени, а францускиот CAC 40 за 1,48 проценти. Во исто време, московскиот MOEX забележа пад од 0,58 проценти.
Вредноста на еврото во однос на доларот изнесува 1,17304 долари, додека златото порасна на 4.677,16 долари за тројанска унца.