Светската метеоролошка организација (СМО) при Обединетите нации предупредува дека во наредните месеци постои можност за развој на умерен до силен Ел Нињо феномен, кој може да предизвика значително зголемување на глобалните температури и појава на поекстремни временски услови ширум светот.
Овој климатски пореметувач е добро познат по својот капацитет целосно да ги измени временските прилики на неколку континенти одеднаш.
Според Светската метеоролошка организација (СМО), Ел Нињо претставува периодично затоплување на површинските води во централниот и источниот дел на Тихиот Океан, кое обично трае меѓу девет и 12 месеци. Организацијата наведува дека актуелните океански услови веќе укажуваат на негово засилување.
Прогнозите на светските метеоролози покажуваат дека првите посериозни удари врз климата може да се очекуваат веќе во текот на ова лето.
Се очекува овој климатски феномен да донесе температури над просекот во голем дел од светот во периодот од јуни до август, а неговото влијание би можело да се почувствува сè до ноември.
Раководството на метеоролошката агенција на ОН веќе упати јасен повик до владите за итна подготовка на капацитетите за заштита.
„Треба да се подготвиме за потенцијално силен Ел Нињо кој ќе ги влоши сушите, но исто така ќе донесе обилни дождови и ќе го зголеми ризикот од топлотни бранови и на копно и на океан“, изјави генералниот секретар на СМО, Андреа Селесте Сауло.
Океанските мерења под површината на водата откриваат загрижувачки аномалии кои дополнително го потхрануваат овој процес.
Од организацијата дополнуваат дека под површината на тропскиот Пацифик се забележани исклучително високи температури, кои во одредени делови надминуваат шест степени Целзиусови над просекот, создавајќи голем топлински резервоар што го поттикнува затоплувањето.
Поради сериозноста на наодите, првиот човек на ОН повика на глобална акција за намалување на штетните емисии во атмосферата.
Генералниот секретар на ОН, Антонио Гутереш, предупреди дека светот мора сериозно да го сфати ова климатско предупредување и повика на забрзана транзиција од фосилни горива кон обновливи извори на енергија.