Македонската берза денеска официјално ќе го започне проектот наменет за поттикнување и подготовка на домашните компании за пристап до пазарно финансирање.
Проектот е поддржан од Европската банка за обнова и развој (ЕБРД), врз основа на потпишаниот Меморандум за соработка, а неговата реализација ќе ја спроведуваат PWC Северна Македонија и PWC Хрватска.
Во рамки на иницијативата, до десет компании ќе добијат стручна и независна анализа на нивната подготвеност за излез на пазарот на капитал преку издавање акции или корпоративни обврзници.
Избраните компании ќе имаат можност да учествуваат и на специјализирана лидерска академија, како и да добијат конкретни насоки и препораки за подготовка на идно прибирање средства преку капиталниот пазар.
Од Македонската берза посочуваат дека проектот треба да придонесе кон развој на нови финансиски инструменти и зголемување на бројот на компании што ќе користат можности за финансирање преку берзата.