За Северна Македонија, земја со ограничени домашни извори на енергија и висока зависност од увоз, енергетската поврзаност и регионалната соработка се клучни предуслови за економска стабилност и долгорочен развој. Во таа насока се и напорите на Владата за зголемување на , истакна заменик-министерот за надворешни работи и надворешна трговија, Зоран Димитровски, на панел-дискусијата посветена на енергетиката во рамките на меѓународниот форум „Развој на перспективите на Индо‑Медитеранот преку Коридорот Индија – Блискиот Исток – Европа (IMEC)“ што се одржа во Трст.
Димитровски нагласи дека функционирањето на овој коридор, особено во услови на тековната криза на Блискиот Исток, е стратешки важно за непречен проток на енергенси меѓу Азија и Европа. Тој потенцира дека развојот на обновливите извори на енергија, модернизацијата на енергетската инфраструктура и зајакнувањето на регионалните енергетски коридори се клучни за позиционирање на Северна Македонија како значајна транзитна и инвестициска дестинација во регионот.
Форумот го отвори потпретседателот на Владата и министер за надворешни работи и меѓународна соработка на Италија, Антонио Тајани. На настанот учествуваа претставници на влади, високи функционери и деловни делегации од Европа, Индија, Блискиот Исток, САД и Балканот.
Покрај панел-дискусијата за енергетика, Димитровски учествуваше и на Конференцијата на Централно-европската иницијатива, со што Северна Македонија ги презентираше своите активности и потенцијали за регионална енергетска соработка и инвестиции.