Генералниот секретар на СДСМ, Александар Саша Димитријевиќ, упати жестоки критики кон извршната власт за време на вечерашното гостување во емисијата „Тема на денот“ на телевизија Сител. Тој го оцени како крајно скандалозно однесувањето на премиерот Христијан Мицкоски, кој јавно на телевизија признал дека телефонски комуницира со јавниот обвинител, се интересира за тековни истраги и директно се меша во работата на правосудните органи.
Димитријевиќ потенцираше дека обвинителството и судството уставно мора да бидат целосно независни од политичките центри на моќ. Според него, недозволиво е високи функционери на ВМРО-ДПМНЕ, меѓу кои портпаролката Марија Митева и министерот за внатрешни работи Панче Тошковски, во јавноста оркестрирано да се обидуваат да го оправдаат ваквото однесување и да ја претстават ваквата противзаконска комуникација како нормална пракса во една демократска држава.
„Скандалозно е премиер на една држава со јасно поделена власт да излегува на медиуми и да раскажува како го прашува обвинителот до каде е истрагата, а уште поскандалозно е што и самиот обвинител го потврдува тоа. Сега гледаме една цела плејада функционери кои нè убедуваат дека е нормално премиерот да се интересира за детали од истрагите и да сугерира како тие да се одвиваат. Со самиот избор на овој јавен обвинител, кој беше личен предлог на Мицкоски, ние изразивме сериозни сомнежи за партизација, а ова што се случува денес е само директна потврда за тоа“, изјави Димитријевиќ.
Во рамки на интервјуто, високиот функционер на опозицијата укажа дека во изминатиот период се наталожиле голем број скандали на актуелната власт кои воопшто немаат институционална завршница, додека премиерот во повеќе наврати го користи своето политичко влијание. Како пример, Димитријевиќ потсети дека Мицкоски и од собраниската говорница отворено му кажувал на обвинителот што треба да прави, споделувал лични предвидувања за судски пресуди и јавно се заканувал кон претставниците на опозицијата.
Генералниот секретар на СДСМ заклучи дека во последните две години владеење на ВМРО-ДПМНЕ, сè што е законски и морално ненормално, преку ноќ станало секојдневна нормалност во општеството. Тој упати силна порака дека со ваквите притисоци врз обвинителите мора итно да се престане, со цел да се спаси и онака кревката доверба на граѓаните во правниот систем на државата.