Генералниот секретар на СДСМ, Александар Саша Димитријевиќ, денеска остро ги отфрли обвинувањата на ВМРО-ДПМНЕ дека остварил средби со претставници на српската опозиција, нарекувајќи ги наводите „класична лажна вест“.
Димитријевиќ ги нарече обвинувањата на партијата на власт како „нова лага“ и посочи на, според него, нелогичноста на тврдењата.
„Ниту сум се видел, ниту ги познавам споменатите Ружиќ и Башановиќ. Особено е интересно што ВМРО тврди дека постои ‘договор за опозициско делување со СПС’ – партијата која е најблизок партнер на Вучиќ и СНС и која со нив ја сочинува владејачката коалиција“, истакна Димитријевиќ.
Според генералниот секретар на СДСМ, ваквите наводи се показател дека политичките опоненти немаат што да кажат, па затоа „измислуваат приказни кои не држат вода ни пет минути“. Димитријевиќ додаде дека граѓаните ги препознаваат овие обиди за дефокус и порача дека таквите методи веќе не даваат резултат.