Претседателот на Движењето ЗНАМ, Максим Димитриевски, денеска изјави дека конечниот епилог околу најавената реконструкција на Владата ќе биде познат во вторник, нагласувајќи дека во моментот на маса се ставени многу идеи и опции.
Димитриевски појасни дека како владини партнери сè уште немаат постигнато конечен договор, но потенцираше дека по оваа реконструкција неговата партија ќе излезе кадровски зајакната.
Околу преговорите со коалициските партнери, првиот човек на ЗНАМ истакна:
„Ние како владини партнери, а слушам и ВЛЕН исто така, како третиот партнер во власта, сè уште немаме постигнато конечен договор. Јас можам да говорам исклучиво во името на ЗНАМ, неговите членови, поддржувачи и сите негови кадри. Но, од друга страна, секогаш е потребно да преземете дел и од одговорноста во власта. И едно можам со сигурност да потврдам – дека по оваа владина реконструкција, ЗНАМ ќе биде посилен и кадровски и со потенцијал и во дел на располагање на директна имплементација на власта во ресорни министерства и пониски ешалони на власта. Ги отфрлам сите шпекулации што доаѓаат првенствено од портали што се директно брифирани и за жал, некои од нив служат како апологети на опозицијата, којашто нè донесе во една тешка ваква социо-економски состојба во државата, а исто така и граѓаните. И велам – ајде да почекаме и да го видиме конечниот епилог“
Тој ги демантираше медиумските написи дека партијата би можела да изгуби одреден ресор, но потврди дека во политиката сите комбинаторики остануваат отворени до официјалниот договор.
Лидерот на партијата се осврна и на односите со актуелните министри од неговите редови, порачувајќи:
„Многу понуди се на маса, ќе изброиме до три, а потоа ќе пресечеме и конечниот епилог ќе го имаме во вторник. А јас, инаку и со господинот Минчев и со господинот Филков и со сите луѓе со коишто заедно ја создадовме ЗНАМ, првенствено сме другари, лични пријатели и обединети околу една заедничка кауза, а тоа е Движењето ЗНАМ за наша Македонија, коешто е формирано од граѓаните и за граѓаните. Бидејќи нам, личниот и политичкиот интерес ни е многу помалку битен во однос на она што значи граѓански и општ интерес за сите. Не би сакал да ги коментирам шпекулациите во јавноста. Постојат многу медиуми што брифираат врз база на принципот „рекла-кажала“ и не би сакал да се спуштам на тоа ниво“
Партискиот лидер посочи дека конечните кадровски решенија и предлози ќе ги донесат највисоките тела на партијата, односно Централниот и Извршниот одбор.
Димитриевски оцени дека тие како нов субјект веќе даваат сериозен придонес за стабилизација на државата:
„Треба да го дадете и вашето мислење за останатите ресори со коишто менаџираат останатите претставници во власта коишто доаѓаат од владините партнери, а да го слушнете и нивното мислење во однос на вас, за да не преовлада субјективизмот. Како и да е, ние сме задоволни од министрите коишто менаџираат со ресорите во моментот. ЗНАМ как нов политички субјект, којшто активно партиципира во оваа власт и ја има усогласено владината програма на којашто работи во рамките и на двете министерства, но и во пониските ешалони на власта, дава сериозен придонес оваа Влада да работи квалитетно и просперитетно и перспективно. Факт е дека оваа Влада, работите првенствено ги враќа на позитивна нула, а потоа ги придвижува напред. Затекнавме многу лоша состојба во државата од сите аспекти и факт е дека мора да санираме, а потоа и да продолжиме“
На крајот, Димитриевски потенцираше дека премиерот го има легитимното право да прави кадровски комбинаторики, а нивно право е дали ќе се согласат:
„Тоа впрочем го потврди и господинот Кошта како висок претставник на Европската Унија, којшто на неговиот брифинг токму со вас укажа дека и тоа како се забележливи резултатите на нашите министри. Но, како и да е, сепак политиката е компромис, разговори, договарање. Ние сме соочени со реконструкција на Владата и првенствено, сите активности во тој дел се менаџирани од страна на премиерот и мандатарот, којшто има апсолутно свое право да посочи, укаже, да направи одредени комбинаторики во делот на распределбата на власта помеќу владините партнери, а наше е дали ќе се согласиме со тоа или не“