Претседателот на Движењето ЗНАМ – за Наша Македонија и актуелен градоначалник на Општина Куманово, Максим Димитриевски, во вечерашното гостување во емисијата „Аргумент плус“ на ТВ 24 отвори повеќе клучни политички теми, испраќајќи јасни пораки за состојбите во македонската политика, реформите во правосудството и европската перспектива на државата. Димитриевски остро реагираше на недоличниот јавен дискурс и конфронтативниот однос на раководството на СДСМ кон новинарите и јавните личности, посочувајќи дека ваквиот наратив е резултат на погрешни и деструктивни ПР-стратегии.
„Не само ПР-стратегијата, туку и ПР-консултантите кои им се донесени од Србија, едноставно не знаат ништо друго освен да водат деструктивни политики, бидејќи резултатот од нивното делување е она што во моментов се случува во Србија“ истакна Димитриевски.
Тој нагласи дека токму поради растечкото незадоволство кај членството, кое „има прекрасни луѓе што никогаш не добиваат шанса“ се случува природен трансфер од СДСМ кон Движењето ЗНАМ. Непрепознатливата идеолошка матрица на СДСМ, според Димитриевски, денес вистински се наоѓа во ЗНАМ и е јасно базирана на темелите на АСНОМ и Илинден.
Во рамки на ЗНАМ, како што истакна, отворено и демократски се дискутира за сите прашања, како на Централниот, така и на Извршниот одбор, а тоа најдобро го потврдуваат бројките и постигнатите резултати. Тој додаде дека нападите насочени кон ЗНАМ од страна на СДСМ во изминатите години не дале никаков ефект, што уште еднаш се потврди и на последните избори. Претседателот на ЗНАМ даде силна поддршка за работата на министерот за правда, Филков, оценувајќи дека реформската агенда се спроведува сериозно и одговорно.
„Голем број закони се веќе во владина и парламентарна процедура. Законот за Судскиот совет ќе биде донесен, и покрај обидите за блокада од опозицијата“ изјави Димитриевски. Тој оцени дека ваквите опструкции претставуваат обид на поранешната власт да ги зачува последните механизми на влијание врз системот, но нагласи дека реформите се неминовни.
„Македонија заслужува непристрасно, професионално судство. И ако реформите задоцнат месец или два – тие ќе се случат“ порача Димитриевски. Во однос на патот кон Европската Унија и состојбата со источниот сосед, тој нагласи дека се неопходни цврсти гаранции од Европската Унија и реципроцитет од страна на Софија, особено во однос на почитувањето на одлуките од Стразбур.
„Македонија е географски и вредносно дел од Европа и мора да стане членка на ЕУ. Нашите граѓани го поддржуваат тоа, но Европа мора да покаже поголема флексибилност и да најде начин билатералниот проблем да не се решава на мултилатерален начин“ истакна Димитриевски.
Движењето ЗНАМ – за Наша Македонија останува доследно на својата заложба за демократска политичка култура, длабоки институционални реформи и јасна, достоинствена и европска иднина на државата.