Министерката за финансии Гордана Димитриеска-Кочоска денеска изјави дека за реализација на стратешките проекти не е доволна само политичката определба, туку е потребна и стабилна и одржлива финансиска рамка.
Таа ова го истакна пред потпишувањето на договорите за финансирање на изградбата на железничката делница Крива Паланка – Деве Баир, дел од Коридорот 8, што се одржа во Владата.
Димитриеска-Кочоска посочи дека со потпишаните амандмани кон договорите за финансирање и договорот за грант се обезбедува финансиската конструкција за целосна реализација на проектот.
„Со овој документ создаваме услови за непречено продолжување на реализацијата на еден од најзначајните инфраструктурни проекти во државата, кој ќе обезбеди подобра поврзаност меѓу Јадранското и Црното Море, поголема економска интеграција, полесно движење на луѓето и стоките, како и нови можности за развој на економијата и целиот регион“, рече министерката.
Таа нагласи дека средствата за третата делница се обезбедени со поддршка од Европската инвестициска банка (ЕИБ) и Европската банка за обнова и развој (ЕБОР), кои, како што рече, се долгогодишни партнери во развојните проекти во земјава.
Според Димитриеска-Кочоска, во изминатите две години Владата работела на забрзување на реализацијата на проектите кои биле во застој, но и на започнување нови инвестиции.
Таа додаде дека преку Ребалансот на Буџетот за 2026 година се обезбедени дополнителни 5,8 милијарди денари за капитални расходи, што претставува зголемување од 14,3 отсто во однос на првично планираните средства.
„Одговорното управување со јавните финансии, обезбедувањето средства за капитални инвестиции и партнерството со меѓународните финансиски институции создаваат основа за одржлив економски раст, поголема конкурентност и побрза интеграција на државата во европските транспортни и економски текови“, рече министерката.
На потпишувањето присуствуваа премиерот Христијан Мицкоски, вицепремиерот и министер за транспорт Александар Николоски, претставници на Европската Унија, ЕИБ, ЕБОР и директорот на Железници – Инфраструктура, Синиша Ивановски.