Вкупна штета од над 15 милиони денари (околу 245.000 евра) му нанел на буџетот на прилепската болница „Борка Талески“ главниот благајник, кој утрово е лишен од слобода од страна на Финансиската полиција.
Против Д.К., вработен како самостоен референт – главен благајник, е поднесена кривична пријава за „проневера во службата“. Според истрагата, тој во период од две години (2020 и 2021), парите што граѓаните ги плаќале на шалтерите за партиципација и приватни услуги, наместо да ги уплати на банкарската сметка на болницата, ги присвојувал за себе.
„За 2020-та година присвоил парични средства во износ од 6.568.726 денари и за 2021-ва година присвоил парични средства во износ од 8.494.558 денари, со што го оштетил Буџетот на ЈЗУ Општа болница… во вкупен износ од 15.063.284 денари“, соопштија од Финансиската полиција.