Православните верници денеска го чествуваат споменот на Светата маченичка Аквилина, која пострадала за својата вера на само 12-годишна возраст во 293 година.
Таа била родена во палестинскиот град Вивлос, од благочестиви родители. Уште во седмата година била наполно упатена во христијанскиот живот, а во десеттата година, преисполнета со ревност, започнала отворено да им Го проповеда Христа на своите пријателки.
За време на прогоните под власта на царот Диоклецијан, Аквилина била поткажана кај царскиот намесник Волусијан. Намесникот најнапред наредил жестоко да ја камшикуваат, а потоа со усвитена шипка ѝ ги прободеле ушите и мозокот.
До последниот здив девицата слободно и јавно Го исповедала Христос, сè додека не паднала како мртва од нанесените повреди. Мислејќи дека е мртва, намесникот заповедал нејзиното тело да биде фрлено надвор од градот на ѓубриште.
Според преданието, во текот на ноќта ѝ се јавил ангел Божји со зборовите: „Стани, биди здрава!“, по што таа застанала на нозе и Му вознесувала слава на Бога, молејќи Го да ѝ допушти да го доврши маченичкиот подвиг. Тогаш од небесата се слушнал глас: „Оди, ќе ти биде како што молиш!“.
Аквилина се вратила во градот, каде градската порта сама се отворила пред неа, и влегла во дворецот директно пред постелата на намесникот, кого го обзел неискажлив ужас бидејќи ја видел жива.
Утредента намесникот издал наредба таа да биде погубена со меч. Пред извршувањето на казната, девицата Аквилина се помолила на колена и го предала својот дух на Бога, а џелатот потоа ѝ ја отсекол главата. Нејзините мошти низ вековите останале запишани како извор за исцелување на мнозина болни.