Министрите од Западен Балкан денеска ќе седнат на „онлајн маса“ со челниците на Европската комисија за да го решат горливото прашање што ги блокираше границите – правилата за престој во Шенген зоната. По минатонеделните протести и блокади на превозниците, Брисел конечно отвори простор за дијалог.
На состанокот, каде учествуваат клучните директорати на ЕК за транспорт и миграција, се бара „прагматично решение“ за возачите кои поради ограничувањето од 90 дена престој во период од 180 дена, често се соочуваат со огромни казни или депортации.
„Комисијата е свесна за загриженоста на транспортните оператори. Се разгледува воведување на ново законодавство со специфични правила за продолжен престој на ниво на ЕУ“, изјави портпаролот на ЕК, Маркус Ламерт. Ова е сигнал дека Брисел можеби за првпат ќе направи отстапка од ригидните правила кои со децении важат за трети земји.