Православните верници денеска го чествуваат споменот на Светиот апостол и евангелист Марко, сопатник и близок соработник на апостолот Петар. Свети Марко е авторот на едно од четирите Свети Евангелија, напишано во Рим на барање на верниците, а посведочено како вистинито од самиот апостол Петар.
По неговото ракополагање за епископ, Марко бил испратен на мисија во Египет, каде станал првиот проповедник на Христовата наука. Со Божја помош, тој успеал да го рашири христијанството низ Либија, Амоникија и Пентапол, по што во Александрија ги поставил темелите на првата Црква.
Неговото делување било проследено со големи чуда, што предизвикало гнев кај незнабошците. По неколкугодишна мисија, при неговото враќање во Александрија, тој бил заробен и изложен на сурови измачувања.
Додека го влечеле по улиците на градот, според преданието, му се јавил Самиот Господ Исус со зборовите: „Мир на тебе, евангелисту Мој!“, на што Марко одговорил: „И на тебе, Господи мој, Исусе Христе!“.
Свети Марко починал од здобиените рани со молитва на усните: „Во Твоите раце, Господи, го предавам мојот дух!“. Неговите свети мошти, погребани од христијаните, низ вековите се почитуваат како извор на исцеленија.