Македонските граѓани денеска го одбележуваат Ѓурѓовден, празникот на Свети Георгиј Победоносец, кој во народот се означува како почеток на летната половина од годината. Празникот е исполнет со мистични ритуали и обичаи насочени кон обезбедување здравје и напредок во семејството.
Клучниот дел од празнувањето се обичаите со вода и зеленило. Куќите се китат со венчиња од билки, а се практикува и ритуално миење со вода во која претходната вечер биле потопени здравец и црвено јајце.
„Според верувањата, децата се мијат ‘за да бидат здрави како дрен’, девојките ‘за да бидат посакувани’, а старите ‘за да ги служи здравјето’“, велат познавачите на традицијата.
Освен верските обичаи, празникот низ историјата бил поврзуван и со магиски верувања за заштита на стоката и плодност на земјата. Во народните песни, свети Ѓорѓи е опеан како светецот кој ги држи клучевите од природата.
Свети Георгиј Победоносец бил храбар заштитник на христијанството, погубен за време на царот Диоклецијан. Неговиот лик на коњ кој ја убива ламјата е еден од најчестите прикази во македонските храмови.