Православните верници денес го чествуваат споменот на Света маченичка Недела, која во времето на царевите Диоклецијан и Максимијан настрадала поради својата христијанска вера.
Таа била измолена со непрестајна молитва од побожните и богати старци Доротеј и Евсевија од Анадолија, кои долго време биле бездетни.
Уште од детството таа му се посветила на Бога, а кога пораснала, ги одбила сите просци со зборовите дека сака да умре како девојка и вереница на Христос.
Поради ова била пријавена кај царот Диоклецијан, кој најпрво ги мачел и протерал нејзините родители во Мелитина, каде што и починале.
Света Недела била испратена на суд кај Максимијан, каде по одбивањето да се откаже од верата, била тепана со воловски жили, а потоа мачена од војводите Иларион и Аполониј.
Според преданието, додека лежела во рани во затворот, ѝ се јавил Господ Христос кој ја исцелил и ѝ ги упатил зборовите за охрабрување.
„Недело, не плаши се од маките, Мојата благодат е со тебе“.
Поради нејзиното чудесно спасување од оган и ѕверови, многумина незнабожци поверувале во Христа, но сите по наредба на судиите биле заклани.
Пред самиот крај на мачењата, Света Недела јасно му го соопштила својот цврст став на војводата Аполониј.
„На ниеден начин нема да ме одвратиш од мојата вера. Ако ме фрлиш во оган, ги имам Тројцата младенци; ако ме фрлиш на ѕверовите, го имам за пример Даниил; ако ме фрлиш во морето, пример ми е пророкот Јона; ако ме предадеш на меч, ќе се сетам на Чесниот Претеча. За мене живот е да умрам за Христа.“
По ова, Аполониј наредил да биде погубена со меч, по што таа клекнала, се помолила за сите што ќе го слават нејзиниот спомен и Му ја предала душата на Бога пред да се спушти мечот. Таа пострадала во 289 година во Никомидија.