Православните верници денес го чествуваат споменот на Светиот свештеномаченик Тимотеј, епископ Пруски, кој во христијанската традиција е познат по својата посветеност и исцелителни моќи. Заради големата душевна чистота од Бога доби дар на чудотворство и ги лечеше сите болести и маки кај луѓето.
Неговото делување и страдање се врзуваат за периодот на владеењето на римскиот цар Јулијан Отстапник.
Страдање во име на верата
Во времето на свирепиот цар Јулијан, којшто се одрече од Христа, свети Тимотеј беше фрлен во затвор, објави 4news.mk. И покрај тоа што бил зад решетки, тој постојано бил опкружен со христијаните кои барале духовна утеха.
Верните го посетуваа и во затворот за да слушнат мудра поука од својот архипастир.
Маченичка смрт во затворот
Неговата популарност и силното влијание врз народот брзо стигнале до тогашните власти, кои решиле сурово да го казнат неговото проповедање.
Кога дозна за тоа, Јулијан нареди џелатот да му ја отсече главата во затворот. Ова беше во 362 година.
Според верските записи, со овој чин завршил неговиот земски живот, но неговото духовно наследство продолжило да живее меѓу верниците. Неговата душа отиде во Рајот, а моштите останаа чудотворно да им помагаат на луѓето и да ја објавуваат силата Божја.