На 11 август 1992 година, со закон „Денес над Македонија“ е прогласена за државна химна на независна Македонија. Денес, 34 години подоцна, химната останува еден од симболите на македонската држава.
Автор на текстот е Владо Малески, а музиката е на Тодор Скаловски. Песната е напишана во 1941 година, а за првпат била изведена на пречекот на Новата 1942 година во Струга, во куќата на Сотир Шута.
По завршувањето на Втората светска војна, „Денес над Македонија“ била усвоена како химна на СР Македонија во рамките на поранешна Југославија. По осамостојувањето, на 11 август 1992 година со закон е прогласена и за химна на независната македонска држава.
Текстот на химната низ годините претрпел одредени измени. Од првичната верзија од 1941 година биле изоставени имињата на Никола Карев и Димитар Влахов, а било додадено името на Даме Груев.
Првата изведба на песната се случила на новогодишниот пречек во Струга, на кој присуствувале активисти на ослободителното движење од Струга и Струшкиот Регион.
Владо Малески подоцна раскажувал дека новогодишниот пречек бил искористен како можност за собирање на младината и разговор за претстојниот вооружен отпор против фашизмот. Токму во рамките на таа програма, Малески, заедно со Боро Путе и Димче Кошарко, ја подготвиле песната „Денес над Македонија“.
Песната набрзо станала широко прифатена низ Македонија, а со текот на времето се наметнала како еден од најпрепознатливите симболи на македонската државност.
На 11 август 1992 година, Собранието го утврди државното знаме. Знамето имало црвена подлога, а во средината било поставено златно-жолто сонце со 16 зраци – осум основни и осум дополнителни. Законот бил усвоен на 11 август, а веќе следниот ден бил објавен во „Службен весник“.
Ова знаме останало во употреба во првите години по осамостојувањето, сè до 1995 година, кога било заменето со денешното знаме.