Собранието на Република Северна Македонија денеска е домаќин на 23. Конференција на КОСАП, која ги обединува парламентарните комисии за европска интеграција и европски прашања од земјите учеснички во Процесот на стабилизација и асоцијација во Југоисточна Европа.
Конференцијата ќе ја отвори и со неа ќе претседава потпретседателот на Собранието и претседател на Комисијата за европски прашања, Антонијо Милошоски. Поздравни обраќања ќе имаат претседателот на Собранието, Африм Гаши, амбасадорката на Германија, Петра Дрекслер, и генералниот секретар на Регионалниот совет за соработка, Амер Капетановиќ.
На собирот ќе учествуваат делегации од Албанија, Босна и Херцеговина, Црна Гора, Северна Македонија и Србија, како и претставници од парламентите на Турција и Грузија.
Во фокусот на конференцијата ќе бидат Берлинскиот процес и неговото значење за регионалната соработка, развојот на транспортната и енергетската инфраструктура, како и перспективите за европска интеграција на земјите од регионот во актуелниот геополитички контекст.
По завршувањето на дискусиите, учесниците треба да усвојат заедничка изјава, по што ќе следуваат изјави за медиумите.