Членката на Извршниот одбор на СДСМ, Симона Цветановски, на денешната прес-конференција упати остри критики до министерот за внатрешни работи, Панче Тошковски, оценувајќи го неговиот двегодишен мандат како поразителен за безбедноста во државата.
Опозицијата тврди дека наместо ветената правда и превенција, во земјата владее неказнивост и партизација на институциите.
„Тошковски ветуваше правда. Велеше: „Брат да ми е, ќе одговара.“ По две години, никој не одговара. Нема одговорност за криминалните афери и скандали на власта. Две години МВР на Панче Тошковски не го гони криминалот. Го штити криминалот на власта“, истакна Цветановски.
Како пример за нефункционалноста, таа го посочи случајот со поминати пет тони дрога преку границата пред шест месеци, за кои сè уште нема одговорност.
Цветановски наведе дека граѓаните секојдневно се сведоци на убиства, вооружени пресметки и семејно насилство, при што ја издвои трагедијата во Кочани каде згаснаа 63 човечки животи, за која тврди дека постојат обиди за прикривање на функционери.
Дополнително, таа ги лоцираше пропустите на полицијата во Скопје, каде беа убиени млада жена и дете по десет претходни пријави, како и случаите на насилство во Велес и Старо Нагоричане, каде МВР не реагирало навреме.
„Тошковски создаде партиска полиција. Искусни полициски службеници се деградираат и преместуваат, а партиски подобните кадри се наградуваат. Нема одговорност за никој“, обвини Цветановски.
На пресот беа споменати и случаите со лицето Симе кое пукаше со автоматско оружје, како и двајцата бодигарди на премиерот, од кои едниот продавал службени информации, а другиот добил условна казна за семејно насилство.
На крајот, СДСМ алармираше дека власта оди чекор понатаму со воведување на државен шпионски софтвер „Pegasus“ за следење на граѓаните, заклучувајќи дека Македонија заслужува професионална полиција во која законот важи еднакво за сите.